Sanaysay Kahulugan – Ano Ang Kahulugan, Bahagi, At Uri Ng Sanaysay?

SANAYSAY KAHULUGAN – Sa araling ito ating matutunghayan kung ano ang kahulugan ng sanaysay sa Tagalog at mga bahagi, halimbawa, at uri nito. Ito ay kinalap mula sa mga makatang Pilipino na siyang sumulat ng mga sanaysay na ating ginagamit at nagbibigay inspirasyon sa atin ngayon.

Ano Ang Kahulugan Ng Sanaysay?

Ang sanaysay o essay sa Ingles ay isang uri ng sulatin may pokus sa iisang diwa at paksa. Ang isang sanaysay ay kadalasang naglalaman ng mga pananaw, kuro-kuro, o opinyon ng isang awtor o akda.

Ang mga sanaysay ay isang komposisyon na kalimitang naglalaman ng personal na kuru-kuro ng may-akda. Naipapahayag ng may akda ang sariling impormasyon, magpahayag ng nararamdaman,magbahagi ng opinyon, manghikayat ng ibang tao, at iba pa.

Gamit ang malawak na pag-iisip maaaring tumalakay ng iba’t ibang paksa gaya ng pag-ibig, kapaligiran, pamilya, lipunan, mundo, at iba pa.

See also: Talumpati Kahulugan – Kahulugan, Halimbawa, At Uri Ng Talumpati

Sanaysay Kahulugan – Ano Ang Kahulugan, Bahagi, Halimbawa At Uri Ng Sanaysay

Sanaysay Kahulugan - Ano Ang Kahulugan, Bahagi, Halimbawa At Uri Ng Sanaysay
Sanaysay Kahulugan – Ano Ang Kahulugan, Bahagi, Halimbawa At Uri Ng Sanaysay

Sanaysay Kahulugan – Bahagi Ng Sanaysay

Batay sa nabasa ninyo sa itaas tungkol sa kung ano ang kahulugan ng sanaysay, narito naman ang mga bahagi ng sanaysay mula sa philnews.ph.

Time needed: 1 minute.

Narito na ang bahagi ng sanaysay.

  1. Simula / Panimula

    Ang panimula ang pinakamahalaga na bahagi dahil dito ang inaasahan kung ipagpatuloy ng mambabasa sa kanyang binabasang sulatin. Nararapat lamang na makuha ng akda ang atensyon at damdamin ng mambabasa.

  2. Gitna / Katawan

    Sa bahaging ito ng sanaysay naman mababasa ang mga mahalagang puntos o idea ukol sa paksang pinili at sinulat ng may-akda. Dito natin malalaman ang buong puntos dahil ipinapaliwanag ng maayos ang paksang pinag-uusapan o binibigyang pansin.

  3. Wakas 

    Dito isinasara ng akda ang paksang nagaganap sa gitna o katawan ng isinulat niya. Sa bahaging ito naghahamon ang akda sa mga isip ng mga mambabasa na maisakatuparan ang mga isyung tinatalakayan niya.

Ang sanaysay ay nahahati sa 3 bahagi at yun ay ang panimula, katawan at wakas. Ang mga parteng ito ang dapat isaalang-alang ng isang manunulat ng sanaysay.

Sanaysay Kahulugan – Uri Ng Sanaysay

Ngayon na nalaman na natin kung ano ang kahulugan at bahagi ng sanaysay, talakayin naman natin ang mga uri ng sanaysay.

  • Pormal na Sanaysay – Ito ay isang uri ng sulatin na may maayos at seryosong paksa at nilalaman. Mahahalagang impormasyon ang nililikha dito upang mapukaw ang isip at damdamin ng mambabasa. Hindi ito nakabatay sa opinyon ng awtor sapagkat dumaan ito sa proseso nang maingat na pananaliksik at pagsusuri ng mga datos. Karaniwang paksa nito ang mga importanteng tao, pangyayari, mga isyu sa lipunan at kung paano ito masusulusyunan. Ang halimbawa nito ay ang pahayagang editoryal.
  • Di-pormal na Sanaysay – Ang di-pormal na sanaysay ay isang sulatin na mas malaya at naipapakita ng awtor ang kanyang personalidad na parang nakikipag-usap sa isang kaibigan. Karaniwang paksa ng manunulat ang kanyang mga karanasan at pananaw sa mga bagay at pangyayari sa paligid. Nagtataglay din ito ng nakaka-aliw at nakaka-akit na nilalaman sapagkat ang awtor ay hindi na kailangang magbase sa iba.

Ang sanaysay ay may dalawang (2) uri. Ito ay ang pormal na sanaysay at di-pormal na sanaysay.

Sanaysay Kahulugan – Elemento Ng Sanaysay

Pagkatapos nating talakayin ang kung ano ang kahulugan, bahagi ng sanaysay at uri nito, narito naman ang mga elemento ng sanaysay mula sa pinoynewbie.com.

Elemento Ng SanaysayKahulugan
Tema at NilalamanAng tema ay ang kaisipan na siyang iikutan ng nilalaman ng isang sanaynay. Ang tema ay dapay napapanahon at nakakahuha ng interes ng mga mambabasa.
Anyo at EstrakturaSa anyo at estruktura nakapaloob ang tatlong bahagi ng epektibong sanaysay. Ito ay mahalagang sangkap na makakatulong sa may akda at mga mambabasa upang lubos na maunawaan ang daloy ng mga ediya.
Wika at EstiloIto ay ang paraan ng pagsulat at wastong paggamit ng wika ng may akda. Higit na epektibo ang isang komposisyon kung ang manunulat ay gumagamit ng mga payak at simpleng pananalita na madaling nauunawaan ng mga mambabasa.
Elemento ng Sanaysay

Ang sanaysay ay binubuo ng tatlong (3) elemento. Ito ay ang tema at nilalaman, anyo at estraktura, at wika at estilo.

Sanaysay Kahulugan – Halimbawa ng Sanaysay

Sanaysay Tungkol Sa Sarili

Sino Ako?

Ang aking ina, ama, kapatid, tiyahin, tiyuhin, pinsan, at mga kaibigan. Silang lahat ay aking nakasama sa luob ng mahabang panahon. Kilala ko ang bawat miyembro ng aking pamilya, ganuon din naman ang aking mga kaibigan. Alam ko ang mga bagay na hilig nilang gawin at mga lugar na lagi nilang pinupuntahan, pati mga pagkaing madalas nilang kinakain. Ganuon ko sila kakilala, ngunit sapat na ba iyon upang malaman ko kung sino talaga sila? Gaya ng aking sarili. Lubos ko na bang kilala kung sino talaga ako, bilang ako?

Ako, isang simpleng tao. Gaya ng iba mayroon din akong mga pangarap. Mga pangarap na walang katapusan. Kapag mayroon na akong mga ninanais na bagay na aking nakamit ay mayroon na namang bagong pangarap na uusbong sa aking puso at isip. Maiksi lamang ang buhay at walang sandali ang dapat sayangin.

Ako, sa aking pagkakakilala sa aking sarili, ay isang tao na hinding hindi titigil sa isang bagay na aking nasimulan. Sa paaralan, tahanan, sa trabaho, o saan mang lugar ako mapunta ay hinding -hindi ako mag-iiwan ng isang bagay na aking sinimulan na hindi natatapos.

Pagdating naman sa aming tahanan, kasama na sa aking pamilya ay tunay kong maipagmamalaki ang tunay na ako. Maasahan ako sa mga gawaing bahay na hindi na kinakailangan pang utusan upang kumilos. Sa mga suliraning pampamilya naman ay mayroon na akong parte na buong puso kong ginagampanan upang malampasan ang mga problemang iyon sa tulong ng iba pang miyembro ng aking pamilya.

Pagdating sa ibang tao, sino nga ba ako? Ako, bilang isang kaibigan, sa tingin ko ay sapat na ang tunay na ako, upang matawag na isang mabuting kaibigan. Masaya sa oras ng tawanan, at malungkot naman sa mga panahong may suliranin ang isa sa aking mga kasama. Marami na akong nakasama at nakasalamuhang iba’t ibang uri ng mga tao, ngunit walang nagtatagal sapagkat sa lahat ng ayoko ay iyong mga taong may dalawang mukha o yung mga tinatawag nilang “plastic”. Ako kaya kong sumayaw at sumabay sa lahat ng uri ng tugtugin, upang makisama. Kaya kong baguhin ang ang ilan sa mga bagay na aking nakaugalian upang magustuhan ng iba. Hindi ko nais na maraming makikisama sa akin ngunit balatkayo naman ang aking pinapakita. Ang nais ko’y tanggapin ako sa paraan ng kung sino talaga ako. Hindi na baleng ilan lamang ang aking mga nakakasama, nakatitiyak naman akong tunay ang mga ito. Nariyan rin ang aking mga pamilya na alam kong hinding-hindi tatalikod sa akin.

Sabi nila walang ibang nakakakilala sa atin ng lubusan kundi ang ating sarili lamang. Ako kilala ko kung sino si ” Ako” at kung ano ang tunay na”Ako”. Ikaw kilala mo ba kung sino si “Ikaw”at kung ano ang tunay na”Ikaw”.

Sanaysay tungkol sa sarili ni Jim Lloyd.

Batay sa kahulugan, bahagi, elemento at uri ng sanaysay, narito ang isang halimbawa ng sanaysay na pinamagatang Sino Ako?. Ito ay isang halimbawa ng mga maikling sanaysay tungkol sa sarili. Ang sanaysay na ito ay magbibigay inspirasyon sa atin upang mahalin at tanggapin natin kung sino tayo.

Sanaysay Tungkol Sa Pangarap

Ang Pangarap Ko Sa Buhay

Ang pangarap ang nagsilbeng gabay ng aking mga pagsisikap.Ito nalang ang inspirasyon ko na magpatuloy kahit sa mga kabiguan. Ang aking pangarap ay makapunta sana sa ibang bansa.

Gusto ko doon magtrabaho dahil malaking tulong ito sa aming mamaahon sa kahirapan. Sa kabilang dako naman,alam ko na hindi ito matupad kapag hindi ako makatapos ng high school ganoon din sa kolehiyo.Kaya, pagbutihin ko na ang pananaw ko ngayon sa buhay. Mag- aral ako sa ALS habang nagtatrabaho ng kahit ano nakakabuti sa aming pamilya at makatulong sa pag-aalaga sa aking mga bunsong kapatid. Sana makapasa na ako ngayon sa pasulit dahil magpatuloy ako sa kolehiyo upang makatapos ng kurso.

Sa ngayon ako po ay patuloy na umaasang maisakatuparan ang tanging pangarap. Alam kong ang aking mga pangarap ay kayang abutin sa tulong ng Poong Maykapal at sa mga taong nakapaligid sa akin para maisakatuparan ko ang matagal ko nang pinapangarap na pumasa sa pasulit.

Sanaysay tungkol sa pangarap tagalog mula sa millionmiler.com

Batay sa kahulugan, bahagi, elemento at uri ng sanaysay, narito ang isang halimbawa ng sanaysay na pinamagatang Ang Pangarap Ko Sa Buhay. Ito ay isang halimbawa ng mga maikling di pormal na sanaysay tungkol sa pangarap sa buhay. Ang sanaysay na ito ay para maipakita ang mga karanasan ng sumulat tungkol sa tagumpay at pagkamit ng pangarap sa buhay.

Sanaysay Tungkol Sa Magulang

Aking Magulang, Aking Inspirasyon

Pagkapanganak pa lang sa atin ng ating mga ina,magulang na agad natin ang ating kasama. Bata pa lamang tayo sila na ang lagi nating nakikita. Sila ang gumagabay sa atin sa bawat hakbang na tinatahak natin dito sa ating buhay. Sila ang una nating naging guro pagdating sa mga mabubuting asal. At hanggang sa ating paglaki, sila pa rin ang sa ati’y gumagabay.

Nakakapag-aral ako dahil sa aking mga magulang. Mga magulang ko ang aking inspirasyon lalo na sa aking pag-aaral. Sapagkat, sila ang dahilan kung bakit ako nakakapasok sa eskwelahan. Nakakapag-aral ako dahil sa paghihirap nila sa kanilang mga trabaho. Hindi madaling pumulot ng pera. Kaya nga nariyan ang aking magulang upang gawin ang lahat ng kanilang makakaya para lang pangtustos sa aming pamilya lalo na sa pagpapa-aral nila sa akin. Ang saya isipin na nakakapag-aral ako dahil may mga masisipag akong magulang. Na handang ibuwis ang kanilang buhay para lang sa pangarap at tagumpay ng kanilang anak.

Ang edukasyon ang isa sa kayamanang hinding hindi mananakaw nino man. Ito rin yung pinaka magandang regalo na matatanggap natin mula sa ating mga magulang. Kaya’t huwag nating sayangin ang pagkakataon na tayo’y nakakapag-aral. Sapagkat, hindi lahat ng tao ay nakatungtong ng paaralan. Ang swerte natin kung isa tayo sa taong nakatanggap ng isang regalo ng edukasyon. Gawin nating inspirasyon ang ating mga magulang lalo na sa ating pag-aaral. Dahil, sa isang simpleng tagumpay mo lamang sa eskwelahan, matataas na grado mo lang, ang ating magulang ay natutuwa na sa mga bagay na iyon. Isipin nating nagpapakahirap ang ating mga magulang para maibigay lang ang maganda nating kinabukasan. Nasa atin na yun kung paano pa natin palalaguin ang edukasyon na ibinigay sa atin. Walang “PAGOD” sa isipan ng ating mga magulang kapag nakita nila na ang kanilang anak ay nagpupursigi sa pag-aaral. Kaya’t gawin natin lahat ng ating makakaya. Para masuklian natin lahat ng hirap na ipinagkaloob sa atin ng ating mga magulang. Tahakin natin ang daan patungo sa ating magandang kinabukasan upang sa gayon ay matulungan na natin ang ating mga magulang at maibalik na natin lahat ng kanilang pinaghirapan.

Sanaysay tungkol sa magulang tagalog ni Marie Antonette D. Bernardo

Batay sa kahulugan, bahagi, elemento at uri ng sanaysay, narito ang isang halimbawa ng sanaysay na pinamagatang Aking Magulang, Aking Inspirasyon. Ito ay isang halimbawa ng maikling sanaysay tungkol sa pagmamahal o pag-ibig sa mga magulang. Ang sanaysay na ito ay magbibigay inspirasyon sa atin upang mahalin at pahalagahan natin ang ating mga magulang.

Sanaysay Tungkol Sa Ina

“Ang Ilaw ng Tahanan”

Si nanay ang lagi nating kasama sa bahay.Siya ang gumagawa ng mga gawaing bahay, nag-aalaga ng mga anak, naghahain ng pagkain para sa pamilya at siya din ang nagbabadyet ng pera. Ganito kahalaga ang ilaw ng tahanan. Meron siyang kayang gawin na hindi kayang gawin ni tatay. Siya rin gumagabay sa mga anak lalo na kapag wala si tatay. Kaya pagdating sa problema si nanay ang maaasahan.

Ako’y may kilalang ina, isa siya sa mga ina na nagtataglay ng mga katangiang aking na banggit. Isang araw nagkaroon ng malaking problema si nanay. Wala siyang pera upang ipambili ng pagkain para sa kanyang mga anak at ang ikinikita ng asawa ay hindi sapat upang ibigay ang pangangailangan nila. Pero si nanay ay hindi sumuko gumawa siya ng paraan upang masolusyunan ito. Pumunta si nanay sa kamag-anak upang humiram ng bigas. Nanghiram din siya ng pera upang magsimula ng negosyo sa pagtitinda. Sa araw-araw niyang pagsisikap nakabangon sila at lumago ang kanilang negosyo. Nakabayad na ng mga utang at naibibigay narin nya ang pangangailangan ng kanyang mga anak. Ito ang pamamaraan ng ina upang makabangon sila sa buhay.

Ganito ang ating mga ina, gumagawa sila ng mga solusyon para sa problema. Basta nagtutulungan siguradong ito’y masusulusyonan. At ang isa pang sandata ni ina ay ang kanyang pananalig sa panginoon. Kaya ipagmalaki si ina sa iba, dahil di niya man kaya ibigay lahat sa atin pero ang pagmamahal ng ina hindi mo mahahanap sa iba.

Sanaysay tungkol sa kadakilaan ng isang ina mula sa FilPinoy

Batay sa kahulugan, bahagi, elemento ng sanaysay at uri nito, narito ang isang halimbawa ng sanaysay na pinamagatang Ang Ilaw ng Tahanan. Ito ay isang halimbawa ng di pormal na sanaysay tungkol sa dakilang ina. Ang sanaysay na ito ay magbibigay inspirasyon upang mahalin at pahalagahan natin ang sakripisyo ng ating mga ina.

Sanaysay Tungkol Sa Droga

Ang Katotohanan sa Bawal na Gamot

Gamot. Sa siyensa, ang gamot ay sinadya sa mundo na gawin upang makapagbigay-lunas sa sakit. Ito’y medisina upang madaling mawala ang sakit ngunit sa kabila nito ay makapagbibigay sakit kapag inaabuso.

May gamot na bawal tulad ng ginagamit ng mga kabataan ngayon. Karamihan sa kanila ay nalulong na sa bisyo lalo na sa paggamit ng ganitong klasing droga. Iba’t iba sa kanila ay may iba-ibang dahilan kung bakit sila gumagamit nito. Kahit alam man ng iba na ito’y nakakasama sa kalusugan lalo sa katawan ay patuloy pa ring gumagamit. Ang ganitong sitwasyon ang pinakapangunahing problema ng lipunan sa panahon ngayon dahil marami na ang masamang pangyayari na naganap sa lipunan tulad ng panggagahasa dulot ng paggamit ng ipinagbabawal ng gamot. Marami na ang nahuli sa ganitong mga gawaing masama at patuloy pa rin itong nangyayari hanggang ngayon.

Kinakailangan ang masusing pagsusubaybay ng mga magulang sa mga anak para madaling malaman at mapigilan kung sila ba’y gumagamit ng bawal na gamot. Sa pamilya kadalasan nagsisimula ang pagkalulong ng mga kabataan sa bawal na gamot. Lalo na ang mga mahihirap na mga pamilya na madalas ay nag-aaway ang mga magulang dahil sa kakulangan ng pera para panggastos sa pamilya. Kaya ang mga kabataan ay nahuhumaling na pumasok sa iba’t ibang bisyo lalo na sa paggamit ng bawal na gamot dahil iniisip nila na mawawala daw ang problema kapag gumamit sila nitong bawal na gamot o droga.

Ang isa rin sa mga pangunahing dahilan kung bakit maraming mga kabataan ang nalulong sa bawal na gamot ay ang kapabayaan ng mga magulang sa kanilang mga anak. Maaaring trabaho o negosyo lang ang palaging inaasikaso ng mga magulang at nawawalan na ng oras para sa kanilang mga anak.

Kung pababayaan lang ng mga magulang ang kanilang mga anak na malulong sa ipinagbabawal na gamot, maaaring ang mga anak nila ay magdudulot ng malaking puwerhisyo sa kanilang buhay. Ang mga gumagamit ng bawal na gamot ay maaaring matutong magnakaw, magsinungaling, agresibo o walang takot sa paggawa ng masama hanggang sa mawalan ito ng katinuan o mababaliw sa paggamit ng bawal na gamot.

Sa mga tungkulin, mga magulang gisingggg! Anak sa katotohanan…hoy gisingggg!!!!

Sanaysay tungkol sa droga sa Pilipinas ni Khen Salce

Batay sa kahulugan, bahagi, elemento ng sanaysay at uri nito, narito ang isang halimbawa ng sanaysay na pinamagatang Ang Katotohanan sa Bawal na Gamot. Ito ay isang halimbawa ng maikling sanaysay tungkol sa bawal na gamot o droga Tagalog. Ang sanaysay na ito ay para maipakita na dapat ay iwasan at huwag gumamit ng ipinagbabawal na gamot.

Para Sa Iba Pang Filipino Lessons

Maliban sa Kahulugan ng Sanaysay at uri nito, narito ang ilan pa mga mga aralin na pwede niyong basahin.

Summary Sa Sanaysay Kahulugan – Ano Ang Kahulugan, Bahagi, Halimbawa At Uri Ng Sanaysay

Iyan ang mga detalye tungkol sa kung ano ang mga uri ng sanaysay at kahulugan nito. Dagdag na rin ang mga bahagi, layunin at halimbawa na makakatulong sa inyo.

Nawa ay nabigyan namin kayo ng inspirasyon sa pamamagitan nitong kahulugan ng sanaysay at uri nito. Happy reading and God bless.

Inquiries

If you have any questions or suggestions about, Sanaysay Kahulugan – Ano Ang Kahulugan, Bahagi, Halimbawa At Uri Ng Sanaysay 2021 Let us know what you think about this post by leaving a comment below.

We are Proud Pinoy.

Leave a Comment