Tula Tungkol sa Wikang Filipino – 11 Maikling Tula sa Wika

Tula Tungkol sa Wikang Filipino o Tula tungkol sa Wika – Sa araling ito ay ipinapahayag kung ano ang Tula tungkol sa wikang Filipino at ang kahulugan at mga Halimbawa ng tulang may apat na saknong.

Ang pahayag na ito ay binuo upang mabigyan ng angkop na paliwanag ang tungkol sa mga Tula ng wika at para mabigyan kayo nga kaalaman tungkol dito.

Kasama rin dito ang higit sampong halimbawa ng Tula tungkol sa wikang Filipino na tiyak ay magugustohan ninyo.

Tula Tungkol sa Wikang Filipino
Tula Tungkol sa Wikang Filipino

Ang paksang ito ay ginawa nang matuklasan ang tunay na kaisipan tungkol sa mga Tula para sa wika. Sa pagbasa ng nilalaman ng araling ito ay inyo ring matutuklasan ang mga halimbawa at uri ng Tula.

Ano ang Kahulugan ng Tula tungkol sa Wikang Filipino?

Ang Tula o “poem” sa wikang Ingles ay isang anyo ng panitikan nag nagpapahayag ng ideya o kaisipan ng manunulat gamit ang matalinhagang salita. Ito ay binubuo ng mga saknong at taludtod.

Layunin ng bawat tula na maipahayag ang damdamin ng indibidwal sa paraan ng masining na pagsulat. Isa itong paraan upang maibahagi ang nais iparating, kaisipan at mga imahinasyon nga mga manunulat sa mga tagabasa.

Sa susunod na saknong ay ating malalamn kng anu ang sangkap at limang elemento ng tula.

Tula Tungkol sa Wikang Filipino 2021

Tignan ang mga nakalistang tula tungkol sa wika na siguradong magugustohan mu.

Time needed: 10 minutes.

Narito ang mga halimbawa ng tula tungkol sa Wikang Filipino.

  1. Ang Wikang Filipino

  2. Ako’y Wika

  3. Tatag ng Wikang Filipino, Lakas ng Pagka-Filipino

  4. Wikang Filipino

  5. Ang Teknolohiya at Ang Wika

  6. Tula tungkol sa Wikang Filipino: Laging Pana-Panahon

  7. Wikang Pambansa, Wikang Panlahat

  8. Ang Wikang Pilipino

  9. Pilipinong Banyaga sa Wikang Filipino

  10. Iniibig Ko Ang Wikang Filipino

  11. FILIPINO: Wika ng Pagkakaisa

Ipagpatuloy lg ang pagbabasa hanggan sa dulo nang artikulong ito para makita mu ang mga nilalaman ng bawat isang Tula tungkol sa wika.

Limang Elemento ng Tula

Narito ang mga sangkap at limang elemnto ng tula.

  1. Sukat – Ang sukat ng tula ay tumutukoy sa bilang ng mga pantig sa bawat taludtod. Ang mga pantig ay paghahati ng salita na nakabase sa paraan ng pagbasa nito.
  2. Saknong – Ito ay binubuo ng mga taludtod o linya ng mga salita sa isang tula. Bawat pangkat ng mga salita ay nakabase sa uri ng tula.
  3. Taludtod – Ito ay pangkat ng mga salita sa isang linya ng bawat saknong. Ang mga linya o taludtod ay maaring may tugma at sukat. Nakabase ito sa uri ng tula na sinulat at binuo.
  4. Tugma – Ang Tugma ay maaring wala o naroon sa bawat huling pantig ng mga taludtod. Ito ay makikita lamang kung ang uri ng tula ay pormal.
  5. Talinghaga – Ang mga talinghaga ang nagbibigay kulay at kagandahan sa kabuuan ng isang tula. Sa pamamagitan ng mga talingaha ay may magandang pakinggan at basahin ang nilalaman nito.

Narito ang halimbaawa ng Tula tungkol sa wikang filipino na may apat na saknong.

Halimbawa ng Tula Tungkol sa Wikang Filipino

Narito ang 10+ halimbawa ng tula tungkol sa Wikang Filipino.

Ang Wikang Filipino

Ang wikang Filipino ay katangi-tangi
Hindi mapagkakaila ni maitatanggi
Wikang nagbubuklod at nag-iisa
Sa ating lahi, kapuso’t, kapamilya

Nawa’y pahalagahan, at bigya’ng kabuluhan
Pagka’t ang wikang ito ay nag-iisa lang
Walang makapapantay sa tanging karanasan
ng Wikang Filipino, ng mga panahong nagdaan

Lahat napagdaanan para lang makamtan
Kalayaan sa kamay ng mga dayuhan
Dugo’t pawis natamo sa mga kasaysayan
Ngunit hindi ininda, matamong kahirapan

Kaya’t akoy nananawagan sa ating kabatan
Wikang nakamit ay wag nating pabayaan
Ibahagi ang handog ng ating kanunuan
Upang wikay mapreserba at mabigyang kabuluhan

Tula ni Grasya

Tula tungkol sa Wikang Filipino: Ako’y Wika

Wikang Filipino ang aking pangalan,
Ipinanganak ko itong kalayaan,
Ako ang ina at siyang dahilan,
Ng pagkakaisa at ng kasarinlan!

Sapagkat ako nga ang siyang tumanglaw
Sa bansang tahanang iyong tinatanaw,
Katulad ng inang sa iyo ay ilaw,
Nagbibigay-sigla’t buting sumasaklaw!

Ako rin ang ama at naging haligi,
Ng mga sundalo at mga bayani,
Sa digmaan noon sa araw at gabi,
Ako ang sandatang nagtaas ng puri!

Pagkat akong wika ang lakas mo’t tuwa
Ako’y lakas nitong bisig mo at diwa
Sa pamamagitan ng aking salita,
Ligtas ka sa uring luksong masasama!

Sinalita ako at gamit ng lahat,
Upang mga taksil ay maisiwalat,
Sa Luzon, Visayas, sa lahat ng s’yudad,
Pati sa Mindanao, ako ay nangusap!

At nakamit mo na ang hangad na laya,
Mula sa dayuhang sakim at masama,
Dilim na sumakop sa bayan at bansa,
Dagling lumiwanag, pintig ay huminga!

Wikang Filipino, ginto mo at hiyas,
Panlahat na wika saan man bumagtas,
Ilaw na maalab, sa dilim ay lunas
At lakas patungo sa tuwid na landas!

Tula ni Kiko Manalo

Tatag ng Wikang Filipino, Lakas ng Pagka-Filipino

Ang wika ay apoy – nagbibigay-init,
Sa sanggol na hulog ng anghel sa langit,
Ang inang kumalong at siglang umawit,
Wikang Filipino ang siyang ginamit.

Ang wika ay tubig – na nagpapaputi,
Ng pusong may sala at bahid ng dumi,
Manalangin lamang at saka magsisi,
At patatawarin ng Poong mabuti!

Ang wika ay hangin – siyang bumubuhay,
Sa patid na hinga ng kulturang patay,
Ito’y nagbibigay ng siglang mahusay,
Sa mga tradisyon at pagtatagumpay.

Ang wika ay bato – na siyang tuntungan,
Nitong mga paa ng mahal na bayan,
Wika ay sandigan nitong kasarinlan,
Sa bundok o burol, maging kapatagan.

May alab ng apoy at lakas ng bato,
At kinang ng tubig na wari ay ginto,
Wikang Filipino’y matatag na hukbo
Na lakas ng iyong pagka-Filipino!

Tula ni Avon Adarna

Wikang Filipino

Ito ay punyal na ubod ng talim
Punyal na kumikinang sa gabing madilim
Ang puluhan nito ay utak na magaling
At ang talas nito’y kakaiba kung limiin.

Sa nakaraa’t sa ngayo’y patuloy na hinahasa
Na ang gamit ay kaydaming mga dila
Ang punyal na kaytagal nang ginawang pananda
Ay may bakas na rin ng kalawang at dagta.

Ang punyal na ito ay ang wikang Filipino
Na patuloy na umuunlad sa pag-ikot ng mundo
Ang kapara nito’y matigas na bato
Na ‘pag di ipukol ay di malaman kung ano.

Mula sa isang bibig ay kumalat nang kumalat
Mangyari’y dala-dala ng bapor na laging naglalayag
Ang wikang Filipino’y katulad ng kamandag ng ahas
Na sa isang sarili ay nagpapalakas.

Ang wika sa malayo ay kakaiba sa narito
Iba ang sa kanya, iba rin ang sa iyo
At dahil tayo ay kapwa Pilipino
Yakapin natin ang wikang Filipino.

Ang wikang Filipino ay ilaw ng Pilipinas
Liwanag sa pagtahak sa tuwid na landas
Gamitin natin at gawing lakas
At gawin ding pananggol sa darating na bukas.

Madaling magkaisa kung may pagkakaunawaan
Madaling makakita kung may liwanag na natatanaw
Medaling mananggol kung may lakas na taglay.
Sa lahat ng ito’y wikang Filipino ang daan.

Sa bukas na darating ay ating mamamalas
Ang dating ilaw ngunit bago nang landas
Maaaring paabante, maaaring paatras
Maaaring pababa, maaaring pataas.

Ang wikang Filipino’y magsisilbing gabay
Sa kayraming taong sa Pilipinas namamahay..
Sa tuwid na landas ay walang mawawalay
Kung tayo’y hawak-kamay sa pag-abot sa tagumpay…

Tula ni Marvin Ric Mendoza

Ang Teknolohiya at Ang Wika

Pinagkaitan nga ng mga patinig,
Mga pangungusap – kulang sa katinig,
At kung babasahin sa tunay na tinig,
Ay mababanaag ang kulang na titik!

Sa sulating pormal at mga sanaysay,
Ano’ng pakinabang kung putol at sablay,
Kulang na ang letra’y mali pa ang baybay,
Ang akala yata’y lubhang mahinusay.

Sa paglalahad ng totoong damdamin,
Hindi ba nagkulang sa ibig sabihin?
Sa pagsusulit ba at mga eksamin,
Makapasa kaya kung letra’y kulangin?

Mundong makabago at teknolohiya,
Anong naidulot sa ating pag-asa?
Kabataang dugong mag-aahon sana,
Tila katunggali ng sariling wika.

Ngayo’y nagtatampo – Wikang Filipino
Sa wari’y nasunog ang tunay na mundo,
Ang wika na dapat ay isinasaulo,
Ay lubhang nalimot at nagkalitu-lito!

Tula ni Avon Adarna

Tula tungkol sa Wikang Filipino: Laging Pana-Panahon

Umuusok ang lupa,
Umaso’t, nagbabaga,
Bumibirit ang liyab,
Muntik na ngang magsilab!

Ang araw’y naglalatang,
Harapan ay buyangyang
Saka nakapamaywang,
Nakanguso’t mayabang!

Nag-alsa ang ligamgam,
Bumabangong mainam,
Ang hanap ay kalaban,
Sa mundo ng kawalan…

Isasaboy ang init
At pawis na malagkit
Na tila isang pagkit,
Sa balat – kumakapit!

Tameme lang ang ulan,
Ayaw munang lumaban
Ayaw mabilaukan,
Sa silab na initan…

Hintay muna ng tugma
Maglaro ng gunita
Saka punta sa gitna,
Ilabas na ang handa.

Pagkat talo ang alab,
Kung hindi pa sasalag,
Hintayin na tumalab
Saka na lang pumalag.

Umulan sana bukas…
Panalangin ng pantas
Ganyan nga ang paglutas
Sa pagpapakataas!

Luha ng ulan doon,
Na nagbuhat sa Poon,
Layang gaya ng ibon
Sadyang pana-panahon…

Laging pana-panahon!

Tula ni Avon Adarna

Wikang Pambansa, Wikang Panlahat

Luzon, Visayas, pati na sa Mindanao
Tuwing Agosto’y sabay-sabay humihiyaw
Grupong etniko sa ‘Pinas nagkakaisa
Pinagyayaman pang lalo ang wika nila.

Ilokano, Bisaya, maging ang Tausug
Sa wikang-ginto, Pilipinas ay busog.
Chavacano, Cebuano, Ilonggo’t marami pa
Pagsaluha’t mahalin, bigay ng Dakilang Lumikha.

Iba’t ibang salita man ang banggit
Sa puso’t kaluluwa’y iisa lang ang gamit
Buong pagmamahal itong ipagpunyagi
Kayamanan ng buhay, dugo, at lahi.

Mayamang kultura, kanyang sinasalamin
Makulay na tradisyon, ipinamamahagi din
Wikang Pambansa ay Wikang Panlahat
Gamitin ng tama’t paglingkurang tapat.

Sagisag ng kalayaan, sandigan ng katapatan
Wikang Pilipinong noo’y ating ipinaglaban
Nawa’y ingatan at laging alagaan
Lubos na mahalin, kailanma’y huwag pabayaan.

Tula ni Gerlie L. Palmenco

Ang Wikang Pilipino

Wikang pilipino ay ating mahalin
Ito ang sagisag nitong bansa natin,
Binubuklod nito ang ating damdamin
Ang ating isipan at mga layunin.

Wikang pilipino ay maitutulad
Sa agos ng tubig na mula sa dagat,
Kahiman at ito’y sagkahan ng tabak
Pilit maglalagos, hahanap ng butas.

Oo, pagkat ito’y nauunawaan
Ng Wikang Pambansa sa baya’y ituro,
Tatlumpu’t dalawang taong sinapuso
Ng bata, Matanda, lalo na ng guro.

Napasok na nito’y maraming larangan
Ng mga gawain na pampaaralan,
Transaksyon sa bayan at sa sambayanan
Mga paaralan sa sandaigdigan.

Wikang Pilipino’y dapat ipagtanggol
Lalo’t iisiping dito’y ginugugol,
Ang maraming hirap, Salapi’t panahon
Ng pamahalaan at ng masa ngayon.

Wikang pilipino, ikaw ay mabuhay
Itataguyod ka sa lahat ng araw.

Mula sa website na Pinoyedition.com

Pilipinong Banyaga sa Wikang Filipino

Ikaw kabataan, binibini, ginoo
Sa lahat ng Pilipinong makakabasa nito
Maalam ka ba sa Wikang Filipino?
O isa kang banyaga sa wika mo?

Kamusta o kumusta?
Ano nga ba ang tama sa dalawa?
Tagalog o Filipino ba?
Ano rito ang pambansang wika?

Magaling, kay galing!
Ang isip sa wika ng iba’y matulin
Kapag Wikang Filipino ang usapin
Bakit ba ika’y nagiging antukin?

Sa Ingles kay husay, o napakahusay
Ngunit sa Filipino ika’y nawawalan ng kulay
Nauubusan ng tinig, tinatakasan ng salita
Hala siya sa sariling wika niya ay banyaga!

O kahindik-hindik, kagila-gilalas
Paanong nangyaring di ka matatas
Kung nububuhay lamang si Balagtas
Tiyak mabubuwisit sa’yo ang pantas.

Nasaan na ang bakas ng wika sa pananalita?
Bakit di na kilala ng iyong dila?
Napakarikit naman ng ating wika
Sana lang ito’y iyong nakikita.

Buksan lamang ang iyong kamalayan
Ang wika nati’y makulay kung mamasdan
May kapangyarihang magbuklod ng mamamayan
Ng mga mamamayang niyayakap nitong bayan.

Ang Pilipinong banyaga sa Wikang Filipino
Ay di dapat tawaging isang Pilipino
Mahal mo lang ang Pilipinas kapag gusto mo
Ngunit hindi ba dapat mahalin mo ang lahat ng tungkol dito?

Mula sa website na Pinayunlimited.wordpress.com

Iniibig Ko Ang Wikang Filipino

Ginulo mo ang isip ko sa paraang gusto ko
Pinilit ko mang umiwas ngunit sinuyo mo ako
Itinakas sa ‘king mundo dinala sa’yong palasyo
Aking nadarama hindi ito ordinaryo.

Hanap ko’y salita, angkop na salita
Sa paglalarawan nais ko sanang ipakita
Angkin mong kulay o kay iga-igaya
Bakit ang iba’y hindi ito makita?

Musmos nang ika’y unang makapiling
Ang makilala ka ng malalim yan ang aking hiling
Sana’y makita ka saan man bumaling
Akin kang makikilala gamitan man ng piring.

Naaalala mo ba galak ko sa paligsahan?
Unang sabak ko noon sa talumpatian
May pagdiriwang noon Agosto ang buwan
Nabigo man ang dilag ngunit ako’y may natutunan.

Ang iyong pagkasilang ay dakila pala
Binuklod mo ang mga taong nais magkanya-kanya
Ikaw ang sinag na piniling di makita
Aming lampara sa dilim ng umaga.

O aking Wika nasa puso ka ba nila?
Sa tibukan ng buhay ko’y mabubuhay ka
Mahal ko ang Pilipinas at ang lahat sa kanya
Kaya ikaw Wikang Filipino di ka mag-iisa.

Mula sa website na Pinayunlimited.wordpress.com

FILIPINO: Wika ng Pagkakaisa

Pagkakaisa ano ba ang iyong diwa?
Ito ba’y para sa iba’t ibang lahi at bansa?
Wika, ano ba ang iyong makakaya?
Matibay ka bang sandata sa pagbibigkis ng diwa?

Wika ng pagkakaisa ang isinisigaw mo
Habang ang bayan ay nagdidiliryo
Ninakawan ng kampon ng mga manggagantso
Una sa Hudisyaryo, Lehislatibo at ngayo’y Ehekutibo

Nalilito, nahihilo, utak ay gulong gulo
Saan ba nagmula wika ng tao sa mundo?
Iba’t ibang teorya sa kaisipa’y nabubuo
Wika ko’t wika mo, saan nga ba hinango?

Panawagan ng pagkakaisa sa bawat Pilipino
Wika raw ang magbubuklod, ikaw oh, Wikang Filipino
Ito nga ba’y katotohanan o itinusok lang sa palaso
Upang pagtakpan, pagkitil sa wika ng bayan ko?

Nagbabadya ang kaunlaran sa 2015 ASEAN
Unti-unting ginagapang, pagiging sandaigdigan
Natatangi umanong solusyong maiahon, maliliit na bayan
Magsasama-sama’t magbubuklod, itatakwil sariling pagkakakilanlan

Preparasyon ito sa malawakang globalisasyon
Brunei, Cambodia, Indonesia, Lao, Malaysia, Singapore,
Myanmar, Thailand, Vietnam at Pilipinas ay nagtipon
Binuo ang ASEAN upang gawing matatag na rehiyon

Globalisasyon at Rehiyonalisasyon natatanging solusyon?
Ito ba’y maka-Diyos at sa bawat baya’y mag-aahon?
O ito’y preparasyon ng diyablo’t kaniyang kampon
Na sukat pang naitala sa aklat ng rebelasyon?

Noon pa mang una, batid na ang kalooban ng Maylikha
Iniutos kay Adan at Noah na punuin ang buong lupa
Maging sa tore ng Babel sangkatauha’y sinawata
Nais nilang maging isa ngunit binigyan ng iba’t ibang wika

Pagkat bawat wika’y kinapaloloban ng sariling kultura
Kailangang pagyamanin sa sarili’t angking lupa
Likas na tumutubo’t nililinang sa kaugalia’t pakikipagkapwa
Tunay na hanguan ng diwang epistemolohiya

Nagbabadya ang pagkitil sa pagkatao’t pagkakakilala
Unti-unting tatabunan kalikasan ng bawat bansa
Pipintahan ng mapagkunwang kaunlaran at pag-asa
Nang maisakatuparan pagwawakas at pagkawasak na naitala

Wika ng bawat bansa, dapat na dinadakila
Minamahal, ginagamit, nililinang, inaaruga
Natatanging sandata sa preserbasyon ng kultura
Na tunay na diwa at kasangkapan ng pagkakaisa!

Tula ni Jennifor L. Aguilar

Konklusyon sa Tula Tungkol sa Wikang Filipino

At yan po ang bumubuo ng ating talakayan. Sana ay nakatulong ang araling Tula Tungkol sa Wikang Filipino at mga halimbawa sa inyu. Para po sa karagdagang kaalaman ninyo sa ating topiko ay maaring ma i-download ang PDF tungkol sa Tula.

Pagtatanong

Kung kayo ay may katanungan o suhestyon tungkol sa topiko tungkol sa kun Tula Tungkol sa Wikang Filipino, maari po ninyong itala sa komento.

Karagdagang Topiko at Aralin:

Leave a Comment